CDبتاريخ حياتى ....بحلوو...بمرة ...اتكلم من القلب( MoooHaaa)

بصم بقا انا الفكرة دى وصلتنى الفكرة دى منين الله اعلم
انا بقا يا جماعة بما ان احنا فى القصص الواقعية
كل واحد يكتب حياتة فى قصة
المهم بس القصة دى الى هيكتبها بجد يكتب انما كلاام فى الهجايص ولا كلمتين ويمشى
ها يوليد كلمتين ويمشى ما علينا
المهم ان الكل يدخل يكتب قصة حياتة من طأطأ لسلاامو عليكو
انتم اية رايكم فى الفكرة دى
Twisted Evil

جامدة

وحشة

اى حد يدخل بالدور ولا تمشوها بلاكبر سنا انا محدتش مين الى يدخل الاول
المهم الى يدخل الاول يورينا مثال
ويلا سلاااااام لما اشوف مين الى داخل

حلو فكره

بس تامر فضله 5 دقايق ويدخل المنتدى بتاعه

شويا كده وهاجى احكى

فكرة جامدة يا ميجو
وتم تثبيت الموضوع
وانتظر مني قصة حياتي قريب قوي
سلااااااااام

اشطة دا الفكرة عجبتكم
اوكشن المهم انا مستنى اى حد يبداء

حلوه اوى اوى الفكره دى يا ميجوو
موضوع جامد

زي ما وعدتك يا ميجو اني قريب قوي هنزل بقصة حياتي

خدي ياعم اهي

اولا احب اعرفكم بنفسي

الاسم : سامح جلال جلال فراج

السن : 25 سنة

الوظيفة : محاسب

المؤهل : بكالوريوس تجارة جامعة عين شمس دفعة 2004

الحالة الاجتماعية : اعزب وبدور علي بنت الحلال

نبدا بقي :

انا اتولودت في القاهرة في يوم 1/7/1982 ويوم 10 رمضان في منطقة فندق السلام ابويا وامي اصلا من الشرابية واكيد تسمعو عنها وقعدنا في منطقة فندق السلام حوالي ست شهور بعد ولادتي وبعد كده رحنا حدايق القبة وتميت سنة هناك وكان اول عيد ميلاد ليا كان تحفة كانت تقريبا العيلة كلها موجودة بس ده عرفتو من الصور اكيد مكنتش فاكر يعني كنت متربي بدلع قوي واللي عايزة بيجييلي كبرت وبعد ما اتولدت بسنة و8 شهور شرفت رانيا اختي البيت وبقينا اتنين واتفقت مع جلال ساعتها كفاية كده بقي ( ههههههههههههههههههه ) كبرنا مع بعض ودخلنا المدرسة بس انا اكيد دخلت الاول وكانت مدرسة سالي الخاصة بشارع مصر والسودان واختي دخلت السنة الي بعديا وجت في تانية ابتدائي مصاريف المدرسة زادت وكنت انا ورانيا وابويا مقدرش يتحمل مصاريفنا احنا الاتنين وخصوصا هو كان لسه شغال في المقولين جديد ومرتبه مش عالي قوي يعني خرجت انا واختي من المدرسة الخاصة كنت انا في تانية وهي في اولي ابتدائي ورحنا مدرسة حكومة اسمها حدايق القبة الابتدائية بس عشان رانيا كانت داخلة بدري سنة فعادت اولي تاني في المدرسة الحكومية المهم رحت انا المدرسة بقيت في تالتة وهي في اولي كل يوم نروح سوا ونرجع سوا اتعرفت علي ناس كتير طبعا كبرت وبقيت في سنة خامسة وطلعت اول واخر رحلة طلعتها تبع مدارس وكانت في جنينة الحيوانات ودي كانت اول مرة اتحمل مسئولية لاني طلعت انا واختي ومكنتش عارف اخد راحتي هناك وكل شوية اشوفها فين المهم رجعنا وكان يوم جميل واستمتعنا كلنا وخلصت خامسة بتفوق وانا من اول خمس طلاب علي المدرسة وطلعت مصيف في قرية عثماسون بجمصة تبع المقولين وقابلت هناك اول حب في حياتي ايوة اول حب وانا لسه عندي عشر سنين

تخيلو انتو بقي عيل عندو عشر سنين بيحب ( عيال فاقدة ) كان اسمها سهام وتقريبا كانت قدي في السن كنا بنتكلم في الجواز والحب وفعلا كنت معاها علي طول الاسبوع كله مش بسيبها خالص لحد ما مرة اتخانقت معاها وزعلت معاها قوي وجه يوم السفر وانا خلاص مش مصدق اني مش هشوفها تاني وعمال اعيط وماما تقوللي بتعيط ليه ومكنشتش عارف اقولها ايه اقولها ابنك بيحب وهو لسه 10 سنين سكت وقولتلها مفيش عشان هنمشي وانا محروق من العياط واكتر حاجة ضايقتني معرفتش اشوفها خالص اخر يوم ولا حتي اسلم عليها وعمال اعيط قوي وابويا يقوللي خلاص هنيجي تاني وانا عارف اني مش هشوفها تاني خالص خلاص مكنش ساعتها عندنا تليفون ولا اي حاجة مكنتش زي دلوقتي كده يعني هنمشي من هنا محدش هيشوف التاني خالص المهم سافرنا وخلاص وروحنا ومع الايام بدات انسي سهام ودخلت الاعدادية لكن بقي حصلت حاجات كتير قوي في الاعدادية دي غيرت من شخصيتي واهم الحاجات دي هي .............

لا بقي كفاية كده عشان تعبت من الكتابة بكرة بقي نكمل

سلااااااااااااااااام

10 سنين يا موحا موش كبير شوية على الحب؟
المهم كمل الموضوع حلو القصة احلى كمل

اية يا موحا طيب انت موش هتكمل على طول ولا اية ؟

دخلت الاعدادية وبدا حلم الكورة يراودني وفعلا بقي نفسي ابقي لعيب كورة وبدات مع فريق الفصل بتاعي وكنت في 1/3 بس ات كحارس مرمي لان ده المكان اللي كان فاضي في القريق بس كان لازم العب وفعلا لعبت وخدنا دوري المدرسة وطلعت احسن حارس في الدورة لدرجة ان في ماتش مكنش في وقت في الفسحة عشان يتلعب فالمدرس قرر ان الماتش ده يتلعب بضربات جزاء بس كل فريق اربع كرات والحمد لله صديت الاربع كرات ومدخلناش غير جون واحد وكسبنا الماتش وده كان قبل النهائي وقبل ما ادخل اولي اعدادي كنت فاكر ان انا بس اللي في الدنيا كلها اسمه سامح لكن لقيت تلاتة معايا في الفصل اسمهم سامح وكان في الديسك معايا اتنين واحد اسمه محمد حلمي والتاني اسمه محمد حسن ( افتكروا الاسم ده كويس ) وكنت انا ومحمد حلمي زملكاوية ومحمد حسن ده اهلاوي وكان يعيني بيتبهدل مننا وفضلت انا والمحمدين اصحاب قوي والحمد لله نجحت في اولي اعدادي بتفوق كالعادة وخدنا الاجازة وسافرنا جمصة تاني في قرية عثماسون وكان كل املي في المصيف اني اقابل سهام تاني بس كنت عارف ان ده مستحيل لكن اهي عدت واتعرفت علي ناس تانية بس كانت اختي هي اللي بتعرفني عليهم لاني اكتشفت ان الولاد في الزمن كان قليلين قوي وخصوصا في المصيف كان تقريبا كلهم بنات وانا كنت لخمة قوي مع البنات وكنت بخاف اكلم اي واحدة لدرجة اني لو مشيت في حتة فيها بنات ركبي تخبط في بعضها وابقي قلقان وماشي خايف وساعات والله امشي من شارع تاني حتي لو اطول جت تانية اعدادي ودخلت 2/2 وكان معايا محمد حسن برضه وقعدنا في ديسك واحد وكان معايا في الفصل واحد اسمه محمد نسيم وده كان ليه موقف معايا مضحك جدا في مرة وانا في ابتدائي وانا خارج من المدرسة لقيت واحد جي يسلم عليا وبيقوللي ازيك يا سامح عامل ايه قلتله كويس انت مين بقي قاللي انا محمد نسيم انت مش فاكرني قلتله بصراحة مش فاكرك طب اتقابلنا فين قاللي كنا مع بعض في مدرسة سالي قلتله معلش واللهمش فاكر خالص وخلاص مشينا دارت الايام ومحمد نسيم جه معايا في تانية اعدادي اول ما شوفته قولتله ازيك يا محمد عامل ايه وفينك يا راجل من ايام سالي محدش شافك ( وانا اصلا مكنتش اعرفه الا لما جالي المدرسة بس حبيت امثل عليه الدور ) قاللي ياعم منا جتلك مرة في المدرسة ومعرفتنيش قولتله امتي ده مش فاكر يا عم خلاص سيبك مش مهم ومشيت علي كده واطرف موقف حصل في تانية اعدادي كان في ماتش للاهلي والزمالك واحنا كنا فترة مسائية والماتش هيتلعب الساعة 3 واحنا بنروح 5 يعني يكون الماتش خلص

راحت المدرسة كلها متجمعة عالباب وعايزين نروحعايزين نروج وبالطوب في الباب وفضلنا ساعة واقفين لافي حصص اتعملت ولا اي حاجة واخر مالمدرسين زهقو راحو فاتحين الباب ورورحنا ( ههههههههههههههههههههه ) وكان محمد حسن ليه واحد صاحبه اسمه هيثثم وكان جاره وكان واد لذيذ قوي وكنت بحبه جدا وانا كان ليا واحد جاري اسمه كريم كان ساكن قدامي علي طول وكان كريم وهيثم في فصل واحد 2/1 وكان كريم ده من المتفوقين جدا وكل الناس كانت شايفاه واد عبقري وهو فعلا كان عبقري وانا بينه وبيني منافسة حامية جدا في الدراسة والمذاكرة والدرجات ار السنة ومكنش بيفرق عني بدرجات كتير لاني الحمد لله كنت متفوق ومخي نضيف عدينا تانية بسلام ودخلنا تالتة اعدادي وساعتها كانت تالتة دي بعبع السنوات قبل الثانوية العامة لانها كانت بنظان الترم الواحد ودي كانت اخر سنة يطبق فيها النظام ده ودخلت 3/2 وكان معايا محمد حسن وهيثم وقعدنا احنا التلاتة في ديسك واحد وكان ورانا تلاتة برضه محمد ماجد واحمد سمير وعدنان وكنا كل يوم في الفسحة نجيب دومة ونلعب بيها كورة انا ومحمد وهيثم فريق واحمد ومحمد وعدنان فريق ودايما كنا احنا اللي بنكسب لاني كنت بلعب حلو الحمد لله وهيثم برضه كان حريف قوي ومن الناس اللي اتعلمت منها كتير في الكورة ودخلنا في اخر ايام الدراسة ولازم الواحد ينجح بتفوق لان دي تالتة اعدادي وعند باب في الشغل كان بيكرمو الناجحين في الاعدايدة اللي جايبين 90% فيما فوق فكان نفسي اشرف ابويا وانجح باكترمن تسعين في المية وانا مكنتش بحب مادة الدراسات الاجتماعية دي خالص وكنت فاشل فيها وامي بصراحة تعبت معايا فيها قوي وكنا كل يوم نصحي الساعة 6.5 الصبح نقعد نذاكر وانا كنت حاسس اني مش هجيب فيها اكتر من درجة النجاح لكن كنت بحب جدا الرياضة والعلوم وكنت متفوق فيهم الحمد لله وجت ايام المتحانات والقلق وكل يوم انا وكريم نروح الامتحان ونرجع سوا وجت الاجازة وكان في حته ساعتها في الحدايق اسمها الوسعاية كنت بروح العب فيها كورة مع العيال كلها وكانت في واحدة اعرفها من ايام الدرس كانت ساكنة في الحتة دي ووكان اسمها هيام وهي كانت اسم علي مسمي كانت رقيقة جدا وجميلة جدا جدا وكنت ساعات لما ابقي مستني مش بلعب عيني تبقي عالبلكونة بتاعتهم وكانت في اول دور يعني مش هشعلق راسي لفوق بس كنت بحب اشوفها من بعيد وجت الفرصة اني اكلمها في مرة بس زي مانا قولتلكو كنت لخمة وبخاف اكلم بنات وفي مرة لقيت كريم رايح نادي مصر للبترول وده كان ورانا علي طول وكان عمه شغال هناك فكان بيدخل ببلاش ورحت مرة معاه ولعبت والفرق كبير قوي لما تلعب في شارع ولما تلعب في نادي وطلعت النتيجة ورحت المدرسة انا وامي واختي وباب جه من الشغل بدري ودخلنا المدرسة ولا امنها معسكر جيش والاسامي بتتنده ووراها النتيجة وانا قلقان وخايف ومرعوب وعايز اجيب فوق التسعين في المية لقيت ناس بتقولي اسمك اتنده وجبت 245 من 280 يعني 87.5% انا بلمت وجالي هيسترية عياط وابويا دخل الاوضة اللي بيندهو منها ومعاه رقم الجلوس وجاب النتيجة وفعلا طلعت 245 انا سمعت كده اتجننت وبقيت هموت من العياط وابويا والله ما زعلان خلاص معلش ويبوس فيا ويقوللي يابني خلاص وماما تقوللي خلاص يا موحا والله كلنا فرحانين وفعلا هما كانو فرحانين بس منت عايز ابويا يتشرف بيا قدام الناس ويقولهم ابني متفوق ويسلموه شهادة تقدير من الشغل وانا استلم شهادة تقدير وكانت اكتر حاجة كمان خليتني اضايق اكتر ان كريم جاري جاب 270 من 280 وكان التاني عالمدرسة وانا للاسف كنت التامن عالمدرسة بس حصل خير والحمد لله وخلصت الاعدادية وزي ما توقعت جبت في الدراسات درجة مش حلوة وهي 49.5 من 60 وكانت هي اللي مقللة درجتي هي والرياضة ( ودي كانت كارثة اني اجيب في الرياضة درجة وحشة ) وكنت جايب فيها 51 من ستين لكن كنت متفوق في العلوم وجبت 40 من 40 وجبت اعلي من كريم فيها وكان هو جاب 39 لكن خلاص خاصت الاعدادية باللي فيها ودخلنا مرحلة جديدة ودي كانت اصعب فترات حياتي كلها وهي مرحلة الثانوية العامة وشفت فيها ايام وحشة قوي ومش انا لوحدي البيت كله شاف فيها ربنا لا يعوددها تاني

بس دي بقي هقولهالكو المرة الجاية عشان انا رغيت كتير قوي النهاردة

سلاااااااااااااااااااااااااااام

موحا هو ميجوو التانى لحد دلوقتى وسبحان الله بنفس مجموع تالتة اعدادى

بجد موضوع حلو قوى والاحلى بقى انك بعد موحا تبدء تختار مين الل يحكى ياريت انت اللى تختار

هو انت لسة عرفت حاجة موحا داه بلوى لسة قصص الحب عنده كتير داه فلانتينوووووووووووووووووووووووووووووووووووووووووووووووووووووووووووووووو

موحا لو موش عايز تكلم بسرعة
احنا نشوف اى حد علشان نخلص بعضينا

انا بقول الى عندة قصة يقولها
وموحا يبقى يعمل تعديل ويكتبها كلها على بعض

اصبر يبنى

كمل يا موحا

معلش في حاجة نسيتها في فترة 3 اعدادي اني فيها تعبت جدا وجاتلي نزله شعبية حادة وقعدت فترة ممنوع من النزول او اللعب وكنت بروح المدرسة بالعافية وكنت ممنوع من الطوابير وحصص الالعاب وقعدت فترة مكنتش بقدر اخد نفسي وكنت بحس ان روحي بتطلع ورحت 3 مستشفيات لكن مفيش فايدة لسه الالمرض هو هو والعلاج اللي بيتكتب مش بيتغير مكنش قدامنا غير الصبر لحد ما الحمد لله عدن علي خير وخفيت بس كانت من اصعب لحظات حياتي لاني كنت بشوف الموت كل يوم ومن اقل حاجة انهج واحس ان روحي بتطلع بس الحمد لله

دخلت الثانوية العامة وقبليها كنت بحاول ادخل مدارس المتفوقين وعملت اختبرات القدرات ونجحت فيها بس معرفتش ادخل وكل ده انا وكريم برضه لكن في الاخر دخلنا مدرسة اسماعيل القباني في ميدان عبده باشا ودخلت اولي ثانوي وعشان ابويا كان عايزني افضل متفوق زي منا علي علطول دخلت مركز تقوية كنت فيه من وانا صغير بس الناس عرفتني اكتر بعد ما دخلت الثانوي ( المدرسين ) وبعد شهر في الدراسة اثانوية شرف محمد اخويا في شهر 10 ودخلت الجيش رسمي بقي وحصلت مشاكل في المركز اللي كنت فيه ونقلت مركز تاني وفي المدرسة كنت في 1/7 وكان الفصل في الدور الارضي وشوف بقي التراب والقرف كله بس كنت مبسوط لان كل صحابي كانو معايا مش مهم في فصل واحد المهم كنا في مدرسة واحدة كنت انا وكريم وهيثم ومحمد حسن بس كل واحد كان في فصل مختلف ودخلنا امتحانات الترم والحمد لله نجحت بس مجموعي كان وحش جبت 99 من 140 وخرجت من المدرسة وانا بعيط بس كنت جايب في الكيميا 10 من 10 الفيزيا 8 من 10 لكن المواد الادبي زي الانجليزي والعربي والتاريخ الجغرافيا هي اللي مقللي مجموعي ومرت الايام وابويا طبعا زعل مني بسبب الموضوع ده بس الحمد لله عدت ومفيش حاجة خلاص ودخلنا امتحانات اخر السنة وخلصت ونجحت بس برضه بمجموع اي كلام 201 تقريا او حاجة قريبة من كده وابويا برضه زعل مني وقعد فترة مش يكلمني وانا كمان كنت زعلان من نفسي قوي بس الحمد لله عدت علي خير وبقيت خلاص بروح مع كريم النادي علي طول وقعدت فترة رقم واحد في النادي لدرجة ان الناس بقت تختارني اول واحد في الفرقة وكنت بشترط علي اي حد كريم يلعب معايا في فريق واحد لاني مكنتش بحب يلعب قدامي عشان محدش يخرجه وفعلا الشهرين دول لو كنت قدمت في اي نادي كنت هتقبل وبسهولة لاني كنت بلعب كل يوم لكن بابا برضه مارضيش عشان خاطر دراستي والثانوية ومستقبلي يجي يشوف دلوقتي انهي مستقبل احسن جه شهر سبعة وبدات معاه المشاكل صاحب البيت اللي قدامنا اشتري البيت اللي احنا فيه وبدا عملية تطفيش الناس اللي ساكنة فيه وبدا بالدور الارضي وكان راجل ساكن هو ومراته وعياله متجوزين وقاعدين لوحدهم كان يخليه يروح الشغل ويخلي يعالة تضايق مراته ويرمي زبالة قدام الشباك بتاعهم لدرجة انه مرة خبط عليها ولما فتحت راح شاددها لبرة وضربها وبعديها طبعا الراجل طفش سافرنا احنا العريش نصيف ورجعنا وبدات المشاكل معانا بدا يعمل مشاكل مع ابويا وكان عايز يشتري الشقة بالعافية وبابا مش راضي وبدا معانا نظام التطفيش يرمي زباله عالسطح بتاعه وسطحة كان في وش البلكونة بتاعتنا لدجة انه بقي يربي حمير عشان الريحة تقرفنا لحد ما حاول يعمل مع والدتي زي ما عمل مع مرات الراجل اللي تحت بس طبعا محدش ساعتها سكتله والدنيا كلها قامت عليه وكان اليوم ده من اصعب الايام ماما اتصلت بالعيلة كلها وتقريبا كانت الشرابية وما حولها عندنا في المنطقة واتصلت ببابا كان في الشغل طبعا واتصل بالبوليس وصاحب البيت برضه استغل الناس كلها موجودة في البيت وراح متصل بالبوليس وقالهم في ناس بتتهجم عليا وراح قافل باب البيت عشان محدش يخرج لحد ما جه البوليس وركبت الوكس لاول مرة في حياتي كنت انا وعمي وابن خالتي واتنين صحابه واخو صاخب البيت وروحنا القسم ومعملوش حاجة كالعادة لكن ساعتها بابا قرر اننا خلاص مش هينفع نقعد هنا تاني وقرر اننا نشوف شقة تانية بدات عمليات البحث وبدانا الدراسة اختي كانت في تالتة اعدادي وحولنالها الي مدرسة الظاهر وقعدنا في الشرابية لحد مانشوف شقة تانية وانا فضلت في مدرسة اسماعيل القباني ومرت علينا اصعب ايام في الحياة كنا قاعدين في شقة جدي الله يرحمه في الشرابية بس طبعا مش شقتك مش عارف تاخد راحتك وكل شوية واحد داخل وواحد خارج شقة العيلة بقي ومتقدرش ماتقولش لحد ماتجيش وانا كنت في تانية ثانوي ودخلت علمي رياضة انا وكريم برضه بس طبعا مكتش بعرف اذاكر خالص وكنت خلاص فقدت الامل اني ابقي حاجة كويسة مع اني كان نفسي ادخل كلية هندسة بس حسيت ان الامل ده راح خلاص وشفنا شقة كويسة في الشرابية مع ان بابا مكنش عايز ياخد في الشرابية خالص بس مكنش عارف يقعد في شقة العيلة واتفقنا مع الراجل ودفع المقدم وكانت شقة ضيقة جدا بس اي حاجة وخلاص وجه خالي شافها وقال لبابا دي مش هتنفعك وضيقة عليك وبتاع وبابا اقتنع بكلامه وقرر انه خلاص مش هياخدها بس صاحب الشقة كان سافر ومعاه الفلوس وعمي كان ليه واحد قريب مراته ساكن في فايدة كامل في دار السلام وقاله في شقق هنا كتير وكده وشفنا شقة اربع اوض وحلوة وجميلة وكانت 17000 ومضينا العقد وماما جت شافتها وقالت لاء مش حلوة ومش هقعد فيها لان كان فيه قدامنا ناس مربية مواشي ومعيز فوق السطح فطبعا مش هقولكو الريحة هتبقي عاملة ازاي وبدات رحلة البحث عن شقة تانية ولينا بره حوالي 25000 جنيه ومش عارفين ناخدهم لان صاحب الشقة التانية قال لبابا مش هديك الفلوس الا لما يجي ساكن تاني للشقة ودور بابا لحد ما شاف شقة في حدايق المعادي وخدنا كلنا نشوفها عشان بعد كده محدش يقول وحشة وفعلا كانت شقة جميلة جدا والحد لله خدناها ودي اللي قاعدين فيها لحد دلوقتي

بس طبعا ابويا استلف فلوس كتير جدا عشان يعكل ده كله لان الشقة كانت محتاجة تشطيب غير ان لينا فلوس بره مش عارفين نجيبها وخدنا الشقة وكل ده وانا في تانية ثانوي واختي في تالتة اعدادي ونقلنا الشقة في رمضان عام 1998 وكان في شهر 1 واختي كانت بتروح المدرسة في الشرابية كل يوم وترجع لحد ما تخلص وانا بروح العباسية كل يوم عشان المدرسة

كفاية كده بقي عشان تعبت وعندي شغل

سلام

اوكشن يا موحا كفاية خد ريست وابقى كمل
نيس يا عم مردونا

يعنى يا موحا ده انت كنت بتتشحطط وكل ده بسبب ناس وحشه مش عايزه الا مصلحتها

لما يبقى باى يجى دورى هحكيلكم حكايه انما ايه !!!!!!!!!!!!

لالالالالالالالالالالالا

كمل يا موحا

كمل يااااااااااااااااااااااااااااض

[color=plum]ورجعنا تاني ونكمل :

قضينا نص رمضان هناك النص التاني منه بس كانت ايام صعبة قوي علينا كلنا انا في ثانوية عامة واختي في تالتة اعدادي واخويا لسه عنده سنة وشوية والمصاريف بقت كتير وخصوصا انا بابا كان عايز يسد الفلوس اللي عيلنا الكتير قوي قوي بس استحملنا وقربت امتحانات الثانوية وانا كنت حاسس اني مش هعمل فيها حاجة في وسط كل الظروف دي وفعلا ماعملتش حاجة وامتحنت ونجحت بس جبت 150 من 200 يعني 75% وابويا زعل جدا وبكده يبقي فقدت الامل في كليه هندسة وقعدت اتحايل عليه واروح اقدمفي المقاولين عشان العب كورة لكن برضه مرضيش وعدت السنة وخلاص واختي نجحت في اعدادية بمجموع كويس بالنسبة للظروف اللي كنا فيها ودخلت اولي ثانوي في مدرسة المعادي وانا دخلت تالتة وكنت لسه في اسماعيل القباني ومحبتش اني انقل ناس كتير قي قالتلي حول ادبي بس انا مكنتش بحب الادبي خالص ومكنتش هفلح فيه بس كان عندنا بقي كلاكيع في تالتة ثانوي زي الفيزيا والرياضة 2 وكنت في المدرسة دايما في حالي ماليش اصحاب كتير يمكن اعرف الناس كلها بس كنت حاسس ان محدش عايز يعرفني ومكنتش بخاف اقرب من حد عشان ميوقليش انا مش طايقك وكل ده بسبب انعدام الثقة بالنفس وكنت بخاف جدا من البنات لدرجة اني مارضتش اروح مركز تعلميمي في تانية ثانوي عشان خاطر في بنات ( منتهي عدم الثقة ) لكن كان لازم اني اروح في تالتة ورحت وكنت قلقان جدا اول يوم كنت دايما بحس اني داخل علي ناس غريبة ومحدش عايزني وسطيهم وقضيت تالتة بمرها لان مكنش فيها حاجة حلوة وجت الامتحانات والكلاكيع ( الرياضة والفيزيا ) وامتحنت وجت الاجازة ومعاها وداع المدارس بشكل نهائي والاستعداد لبداية حياة تانية خالص حياة الكلية والجامعة وفضلت احلم باول يوم كلية وابويا حجزلنا في مصيف في مرسي مطروح ورحنا هناك وقعدنا 10 ايام جامدين قوي بس معرفتش اتعرف علي حد الا في تالت يوم بسبب قلقي المهم اتعرفت عالناس كلها وسبحان الله كانو البنات اكتر من الولاد وكانو متقسمين بالاعمار يعني كل ولد قدامه بنتين قريبين من سنه لكن اخوكم طبعا شوربة في الحاجات دي وكانو اللي معانا من احسن الناس اللي طلعت معاهم مصايف ( احمد وشريف وانا ومحمد سمارة وايمان وايمان تاني ومنار واختها ) واحمد وايمان الجابي كان ابوه وابها يعرفو بعض من الشغل يعني اتعرفو علي بعض من اول يوم انا بقي دخلت معاهم من تالت يوم ولقيت رانيا اختي بتقوللي منار دي شكلها معجب بيك قوي طبعا انا سمعت كده فطست علي وحي من الضحك طب ازاي وليه وعلي ايه محطتش في دماغي بس كنت بتعامل معاهم كلهم عادي بهزار وتهريج لحد ما جه مرة كنت بهزر مع ايمان وزودنا في الهزار قوي لقيت منار دي خدت جمب فاروحتلها لقيتها بتقوللي ماتتكلمش معايا تاني وخللي ايمان تنفعك ( ههههههههههههههههههههههههههههههه) ساعتها عرف ان كلام رانيا صح بس مكنش في دماغي اي حاجة من ناحيتها قلت يا واد عادي قضيها اليومين دول وخلاص وكل واحد يروح لحاله فضلنا مع بعض وخدنا التليفونات مكنش ساعتها الموبايلات دي منتشرة زي دلوقتي كان قليل قوي اللي تلاقي معاه موبايل وانا هناك عرفت ان نتيجة الثانوية العامة طلعت قلبي وقع في رجليا ولقيت بابا بيقولللي هروح اجيبها من المحافظة بتاعة مطروح طبعا اليوم ده ما روحتش البحر وقعدت في القرية مستنيهم يرجعو وجم ولقيت بابا دخل علي جوه من غير ما يعبر اهلي وماما جت تصحيني ( انا صاحي بس كنت مستهبل ) وقالتلي قوم وعرفت اني جبت برضه في تالتة 150 من 200 يعني 75% يعني خلاص مفيش امل حتي في هندسة حلايب وشلاتين ( ههههههههههههههه) طبعا اليوم ده كان نكد نكد يعني بس الحمد لله انه جه وانا في المصيف عشان الشيخ ما يقلبش عليا طبعا اللي معايا بقي معلش يا سامح وكلنا لها والكلام ده بس انا خلاص مكنش في دماغي حاجة بس مكنتش عارف هدخل كلية ايه وواحد قاللي ادخل كلية الشعب بقي قولتله ايه دي قاللي كلية التجارة قولتله انا ادخل كلية التجارة ( هههههههههههههههههههههه) ورجعت من المصيف وكتبت الرغبات حطيت برضه جميع كليات الهندسة والمعاهد الهندسية وبعديها علي طول حطيت التجارة لان دول المجالين الي ممكن اشتغل بيهم غير كده كنت هبقي قاعد في البيت مستني العدل وقدمت الرغباتوشوية ولقيت البوسطجي بينادي " سامح جلال جلال " نزلت ابص الاقيه جواب الترشيح ( كلية التجارة جامعة عين شمس انتساب موجه) قلت خلاث الخيرة فيما اختاره الله وفضلت احضر نفسي لاول يوم كليه وانا مش عارف اعمل ايه ولا البس ايه وخصوصا ان لبسي كان ايه ( اتفو ) كنت بلبس البنلونات الجينز الواسعة قوي دي بتاعة زمان وعليه اي حاجة مش مهم وجه اول يوم في الجامعة بكرة هروح الكلية يااااااااااااااه مش مصدق معقول وفضلت طول الليل صاحي يا تري ايه اللي هيحصل بكرة وهقابل مين وممكن اشوف حد ما شوفتوش من زمان كل ده بيدور في دماغي وجه بكرة اول يوم في الدراسة

هنكمل بعدين بقي عشان هيما بينادي ربنا ياخده بقي نخلص

حاضر جي جي

[color:82b3=plum:82b3]سلام يا عيال

نيس يا موحا قصة جميلة اوى
وانا اشك انك ممكن تقابل منار هناك ابقى سلملى عليها

هههههههههههههههههههههههههههههه

حلوووووووووووووووووه اوىىىى

الله يخربيت هيما

هو موش بينادى غير فى الوقت المهم

كمل يا موحا بئه كممممممممممل

بس ايه حكايتك مع البنات ياض

كل واحده تعجب بيك

هههههههههههههههههههههههه

طب انا زعلانه منك وخلى منار و ايمان وسهام ينفعوك Razz

كمل بجد

يا وااااااد يا جاااااااااااااااامد انت

كمل والنبى مش قادرة استنى بقة

كمل ياغالى جميله فكرتنى بالذى مضئ